Ўзбекистон Президенти Шавкат Мирзиёев 17 февраль куни «Фанлар академияси фаолияти, илмий-тадқиқот ишларини ташкил этиш, бошқариш ва молиялаштиришни янада такомиллаштириш чора-тадбирлари тўғрисида»ги қарорни имзолади. Қарор матни ЎзАда эълон қилинган.

Қарорга мувофиқ, Ўзбекистон Миллий университети (ЎзМУ) ҳузуридаги Тарих институти Фанлар академияси тасарруфига ўтказилади. Айни вақтда, Фанлар академияси (ФА) таркибида саккизта янги институт ва битта музей ташкил этилади.

Жумладан,

• ЎзМУ ҳузуридаги Mateматика институти негизида V.И.Романовский номидаги Mateматика институти;
• ЎзМУ Физика факультетининг тегишли лабораториялари ва ноёб объектлари, шунингдек, Фавқулодда вазиятлар вазирлиги ҳузуридаги Радиация хавфсизлиги маркази негизида Ядро физикаси институти;
• Тошкент давлат техника университети (ТошДТУ) Муҳандислик-физика факультетининг тегишли лабораториялари негизида У.А.Арифов номидаги Ион-пламза ва лазер технологиялари институти;
• ФА Иншоотлар сейсмик мустаҳкамлиги институти ва ТошДТУ ҳузуридаги Тармоқ машинасозлиги муаммолари илмий-тадқиқот маркази негизида М.Т.Ўрозбоев номидаги Механика ва иншоотлар сейсмик мустаҳкамлиги институти;
• ЎзМУ ҳузуридаги Полимерлар кимёси ва физикаси илмий-тадқиқот маркази негизида Полимерлар кимёси ва физикаси институти;
• Тошкент давлат шарқшунослик институти ҳузуридаги Абу Райҳон Беруний номидаги Шарқ қўлёзмалари маркази негизида Абу Райҳон Беруний номидаги Шарқшунослик институти;
• Самарқанд шаҳридаги Археология институти ва ФА Археология институтининг Тошкент бўлими негизида Я.Ғуломов номидаги Археологик тадқиқотлар институти;
• Алишер Навоий номидаги Тошкент давлат ўзбек тили ва адабиёти университети ҳузуридаги Ўзбек тили ва адабиёти илмий-тадқиқот институти негизида Ўзбек тили, адабиёти ва фолклори институти;
• Алишер Навоий номидаги Тошкент давлат ўзбек тили ва адабиёти университети ҳузуридаги Ўзбек тили ва адабиёти музейи негизида Алишер Навоий номидаги давлат адабиёт музейи ташкил этилади.

Олий ва ўрта махсус таълим вазирлиги ҳузуридаги Ўзбекистоннинг энг янги тарихи жамоатчилик кенгаши ФА ҳузуридаги Ўзбекистоннинг энг янги тарихи жамоатчилик кенгашига айлантирилади, вазирлик ҳузуридаги Ўзбекистоннинг энг янги тарихи масалалари бўйича Мувофиқлаштирувчи-методик марказ ФА тасарруфига ўтказилади, у жамоатчилик кенгашининг ишчи органи бўлади.

Бундан ташқари, Фанлар академиясининг Навоий бўлимини ташкил этиш режалаштирилган. Қарор билан Фан ва технологиялар бўйича Давлат комиссияси ташкил этилади, унинг қошида Илмий-техник фаолиятни қўллаб-қувватлаш ва ривожлантириш жамғармаси тузилади.

Вазирлар Маҳкамаси ҳузуридаги фаолияти тугатилаётган Фан ва технологияларни ривожлантиришни мувофиқлаштириш қўмитаси негизида Фан ва технологиялар агентлиги ташкил этилади, у Фан ва технологиялар бўйича Давлат комиссиясининг ишчи органи бўлади.

Шунингдек, «илмий тадқиқотлар якунлари бўйича салмоқли натижаларга эришган олимларни тақдирлаш учун» Фанлар академиясининг илмий ходимларни моддий рағбатлантириш жамғармаси ташкил этилиши ҳам кўзда тутилган.