Apple корпорацияси корпуси қизил рангли бўлган iPhone 7 смартфонини тақдим этишни режа қилмоқда. Япониянинг Mac Otakara порталининг маълум қилишича, мазкур гаджет компаниянинг март ойида бўлиб ўтадиган кўргазмасида намойиш этилади, деб ёзмоқда Terabayt сайти.

Бунгача iPhone 7s қурилмасининг янги рангли талқинда ишлаб чиқарилиши, унинг фақат Хитойда сотилиши ҳақида хабарлар тарқалган эди. Маълумотларга кўра, iPhone 7 билан бирга 7 Plus ҳам жилодор қизил рангли корпусда ишлаб чиқарилади. Шунингдек, Apple компанияси iPhone SE’нинг 128 гигабайт доимий хотира сиғимига эга талқинини ҳам ишлаб чиқармоқчи.

Шунингдек манбаанинг хабар қилишича, мазкур кўргазмада янги iPad планшет компьютерлари ҳам намойиш қилинади. Унда диагонали 7,9, 9,7 ва 12,9 дюймли янгиланган iPad билан бирга, диагонали 10,5 дюйм бўлган рамкасиз планшетнинг ҳам тақдим этилиши кутилмоқда. Экран атрофидаги рамка олиб ташланган девайснинг ўлчамлари ҳозирги iPad Pro 9,7’ники билан бир хил бўлади. Планшетни 2017 йилнинг май ойидан харид қилиш мумкин бўлади.

iPad Pro планшетининг сўнгги авлоди 2016 йилнинг апрел ойида тақдим қилинган эди. Планшет компаниянинг 256 гигабайт ички хотирага эга илк мобиль гаджети бўлган.