Эроннинг диний етакчиси оятуллоҳ Али Хоменеий Исроил фуқаролари жаҳон тарихининг «ифлос боб»идаги «сохта халқ» эканлигини айтди. Бу ҳақда Associated Press ахборот агентлиги хабар бермоқда. 

Хоменеий бу ҳақда Теҳронда Фаластинни қўллаб-қувватлашга қаратилган анжуманда айтиб ўтди. Бу анжуман 1990-йиллардан бери ҳар 4 йилда ўтказилиб келинади. Оятуллоҳнинг нутқи 33 дақиқа давом этган.

У Исроил яҳудийларни дунёнинг бошқа қисмларидан Яқин Шарққа тўпланиши натижасида яратилган давлат эканлигини қайд этди. Диний етакчининг сўзларига кўра, яҳудийлар фаластинликларнинг ерини эгаллаш ва ушбу заминнинг асл моҳиятини ўзгартириш мақсадида кўчиб келган.

Али Хоменеий Исроилнинг яратилиши «Худо марҳамати билан ёпиладиган тарихнинг ифлос бобларидан бири» эканлигини таъкидлади.

Аввалроқ АҚШ ва Исроил ҳамкорлик, жумладан Эронни бостириб туриш масаласи бўйича ишчи гуруҳлар шакллантириши маълум қилинганди.