Россия ОАВларида кекса кишига ғамхўрлик қилиш мақсадида ишга жойлашган энаганинг қилмишлари ҳақида хабар тарқалди. Гап шундаки, энага ўзбекистонлик эканлиги айтилмоқда, деб ёзади Qalampir сайти.

36 ёшли Месимба Ажелялова кашфиётчи, давлат мукофотининг совриндори бўлган Владимир Бруверга ғамхўрлик қилиш мақсадида 2015 йил апрель ойида сохта ҳужжатлар билан ишга жойлашган эди. У ўз иш фаолияти давомида 76 ёшли кекса кишини доимий тарзда ҳақоратлаган, калтаклаган ва таҳдид қилган. 

Бир йил ичида кекса кишининг саломатлиги оғирлашиб, деярли мустақил ҳаракат қила олмайдиган ҳолатга келган. Бундан ташқари, гапириш қобилиятини ҳам йўқотган.
 
Бу ҳолни кўрган Владимир Брувернинг қизи кузатув камералардаги ёзувлар орқали энаганинг отасига бўлган муносабатини текширган. Энаганинг отасига шафқатсизларча қилаётган муносабатига гувоҳ бўлгач, полицияга мурожаат қилган. Владимир Брувернинг қизи камералардан ёзиб олинган тасвирларни полицияга тақдим этган. 2016 йилнинг 27 май куни энага қидирувга берилган.

Шундан сўнг, Россиядаги телекўрсатувларнинг бирида томошабин сифатида иштирок этган Месимба Ажелялова қўлга олинган. Суд унга 3 йиллик қамоқ жазосини тайинлади. Бу ҳақда РИА Новости хабар бермоқда.

Аввалроқ, ўзбекистонлик қотил-энага Гулчеҳра Бобоқулова ўзи ғамхўрлик қилаётган 4 яшар қизнинг бошини танасидан жудо қилган эди. 

Энаганинг қилмишлари акс этган видеолавҳани эътиборингизга ҳавола этамиз. (Юраги бўшлар кўришини тавсия этмаган бўлардик)