Шарқий Ливияда ҳокимият учун курашаётган гуруҳлар ўртасидан асосий нефть базалари устидан назорат ўрнатишга қаратилган жанглар давом этмоқда, дея хабар беради Al Jazeera телеканали.

Сидр ва Рас Лануф нефть базалари учун «Ливия миллий армияси» ва «Бенғози мудофаа бригадалари» гуруҳлари ўртасидаги тўқнашувлар ҳам ҳавода ҳам қуруқликда давом этмоқда. Жума куни «Ливия миллий армияси» қарши томоннинг ҳужумлари туфайли чекинишга мажбур бўлган.

Якшанба куни «Ливия миллий армияси» бой берган ҳудудларни, жумладан, денгиз портини қўлга киритиш учун қарши ҳаво ҳужумларини бошлаган. Қуруқликда ҳам бир неча марта тўқнашувлар кузатилган. Аммо ҳозирча жангда кимнинг қўли баланд келгани номаълумлигича қолмоқда.

Ливиянинг энг йирик портларидан ҳисобланган нефть терминалларига фуқаролар уруши давомида жиддий шикаст етган. Ҳозирда уларнинг фойдаланиш қуввати урушдан олдинги даражадан пастлигича сақланиб қолмоқда. Шанба куни генерал Халифа Ҳафтар бошчилигидаги «Ливия миллий армияси» иккала нефть базаси қўлдан бой берилганини тасдиқлаган.

Халифа Ҳафтар қўшинлари Ливиянинг йирик нефть бандаргоҳларида назорат ўрнатгандан кейин мамлакатнинг нефть ишлаб чиқариш қуввати икки баравардан кўпроққа ортган. Бунгача Брега портидан бошқа барча денгиз портлари фаолиятдан тўхтаган эди.

Ҳозирда Ливияда кунига 700 минг баррел нефть қазиб олинмоқда. 2011 йилги инқилобдан олдин мамлакат кунига 1,6 миллион баррел нефтни қазиб олар эди. Муаммар Каддофий ҳокимиятдан ағдарилгандан бери мамлакатда бошбошдоқликлар давом этмоқда. Уч йилдан бери ҳокимият учун курашаётган Халифа Ҳафтар бошчилигидаги «Ливия миллий армияси» урушаётган томонлар орасида ҳозирча катта кучга эга бўлиб турибди. Аксарият ливияликлар Ҳафтар тимсолида мамлакатда тинчлик ўрнатишга қодир шахсни кўришмоқда. Ҳафтар қўшинлари ҳозиргача шарқий Ливиянинг катта қисмида назоратни қўлга олганини эълон қиилган.