Электромобил ишлаб чиқарувчи Tesla ҳамда SpaceX космик корпорацияси аъсосчиси, америкалик машҳур тадбиркор Элон Маск  ўз твиттерида катта ваъда берди. Тадбиркорнинг маълум қилишича, агар ишни 100 кун ичида тугата олмаса, объектни давлатга бепул топширади. Бу ҳақда Guardian нашри хабар берди.

Хабарига кўра, миллиардер ўз ёрдамини Жанубий Австралия штати ҳукуматига таклиф этган. Бу штат ҳудудида электр узилишлари тез-тез кузатилади.

9 мартда Tesla’нинг вице-президенти Линдон Рив компания штатдаги энергия таъминотидаги узилишларни ҳал қилишга имкон берувчи 100—300 мегаватт/соат қувватли батареяларни ишга тушириши мумкинлигини маълум қилди.

Жанубий Австралияда электр тизимида аввалроқ юз берган носозликлар таъминотдаги доимий узилишлар ва нарх ўзгаришларига сабаб бўлди. Рив эса компания янги тизимни 100 кун ичида тайёрлаши мумкинлигини таъкидлаб ўтди.

Atlassian компанияси директори Майк Кэннон Брукс Илон Маск твиттер орқали 100 кун ичида электростанция қуриш ҳақидаги гапи қанчалик жиддий эканини сўраган. Маск эса бунга жавобан бу муддат ичида ишни битира олмаса, объектни ҳукуматга текинга топширишга тайёр эканини билдирган.

2016 йилда Tesla қуввати 90 мегаватт/соат батареяли худди шундай тизимни Калифорнияда 90 кун ичида ишга туширган эди. Унинг қиймати 100 миллион долларни ташкил қилади.