Душанба куни Сомали қирғоқлари яқинида нефть ташувчи Арис 13 танкери қуролланган гуруҳ томонидан гаровга олинган, дея хабар бермоқда Guardian​ нашри.

Комор ороллари байроғи остида ҳаракатланган нефть ташувчи танкер Жибутидан Сомали пойтахти Могадишуга нефть олиб бораётган пайтда қароқчилар томонидан қўлга олинган. Кема бортдиа 9 нафар шри-ланкалик денгизчилар бўлгани айтилмоқда.

Сешанба куни Европа Итиифоқи ҳарбий-денгиз кучлари кема гаровга олинганини тасдиқлаган. Евроиттифоқнинг қароқчиликка қарши кураш бўлими кеманинг эгаси билан алоқ ўрнатишга муваффақ бўлган. мазкур ҳодиса 2012 йилдан бери Сомалида илк бор йирик савдо транспортининг қўлга олиниши деб ҳисобланмоқда.

Сомалидаги қароқчиликка қарши НАТО, Хитой, Ҳиндистон ва Эрон кўп йиллардан бери курашиб келади. Бир неча йилдан бери қароқчилар минтақада анча тинчиб қолган ва денгиз қўриқчилари фаолияти тўхтатилган эди. НАТО қўшинлари Сомали қирғоқларини қўриқлашни декабрь ойида тўхтатган. Ўтган йилнинг октябрь ойида БМТ Сомалидаги қароқчилар ҳужумларни давом эттириш имкониятига эгалигидан огоҳлантирган эди.

Қароқчилар талаб қилинаётган тўлов миқдори ҳақида бир қарорга келмаганликларини маълум қилишган. Кема қуролланган қароқчилар томонидан Алула шаҳри қирғоқларида ушлаб турилгани хабар қилинган. БМТ маълумотномасига кўра, Арис 13 танкери БААнинг Фужайра шаҳрида рўйхатдан ўтган Арми Шиппинг СА компанияси мулки ҳисобланади.

Сомали қароқчилари товон пули ундириш мақсадида кемаларни ва уларнинг экипажини гаровга олишади. Улар одатда экипаж аъзоларини ўлдиришмайди. Сомали қирғоқларида қароқчилик фуқаролар уруши бошланган 1991 йилдан бери одатга айланган. Халқаро ҳамжамиятнинг уринишлари туфайли сўнгги йилларда қароқчилик деярли содир бўлмай қолган эди.