Англиянинг The Physiological Society руҳий тадқиқотлар жамияти томонидан одамларни стрессга солувчи ҳолатлар мавзусида ўтказилган изланишлар натижасига кўра, смартфонни йўқотиб қўйиш бугунги техно-жамият фуқаролари учун мисоли террор таҳдидига учраш билан баробар ҳолат экан. 2 минг иштирокчи ўртасида ўтказилган сўровлардан маълум бўлдики, смартфонни йўқотган одам яқин кишиси дунёдан кўз юмганда, ўзи оғир касалликка чалинганда, шахсий маълумотларини ўғирлатиб қўйганда, тоғ бағрида дам олишдан маҳрум бўлганда пайдо бўладиган тушкунликдан кам бўлмаган стресс олар экан, деб ёзмоқда Terabayt сайти.

Айниқса, эркаклардан кўра бугунги европалик аёлларнинг қўл телефонларини йўқолишидан кўпроқ сиқилишлари аниқланган.

Жамият томонидан шакллантирилган рўйхатда террор таҳдиди 13-ўринда қайд этилган. Ундан кейинги ўринлардан тўйни режалаштириш, янги уйга кўчиб ўтиш каби воқеалар жой олган. Жамият раҳбари Люси Доналдсоннинг таъкидлашича, бугунги одамларни 50 йил аввал тасаввурда ҳам бўлмаган смартфон, ижтимоий тармоқ каби замонавий омиллар тушкунликка солмоқда. Мисол учун, 1960-йилларда ўтказилган худди шундай сўровда одамлар яқин кишисидан айрилиш, оилавий ажримни кучли стресснинг сабабчилари деб билишган.

«Инсон мияси, асаб тизими ва гормонал тизим тушкунликка нисбатан ожиз бўлиб, стресс инсон юрагини ишдан чиқаради, иммун тизимини кучсизлантириб, ошқозон-ичак фаолиятини бузади. Тушкунлик узоққа чўзилса, у инсон ҳаётига ҳам зомин бўлади», дейди мутахассис.