Британиялик машҳур физик олим, 75 ёшли Стивен Хокинг Virgin ITV телеканали эфирида Virgin Galactic компанияси кемасида коинотга учишини маълум қилди. Бу ҳақда Daily Mail хабар бермоқда.
Бахт нимада эканлиги ҳақидаги саволга олим уч нафар фарзанди унинг энг катта қувончи эканлигини билдирди.
«Мени яна нима бахтли қилишини айтишим мумкин: бу коинотга саёҳат. У ерга ҳеч ким мени олиб кетмаса керак деб ўйлагандим, бироқ Virgin Group эгаси Ричард Брэнсон Virgin Galactic кемасида жой таклиф этди. Ўша заҳоти розилик бердим», — дея таъкидлади Стивен Хокинг.
Хокинг замонамизнинг энг машҳур назариётчи физикларидан бири ҳисобланади. 1963 йилда олимга уни фалажликка олиб келган ён амиотрофик склерози ташхиси қўйилган. Хокинг сўзлаш қобилиятини йўқотган ва ўз фикрларини билдириш учун нутқ синтезаторидан фойдаланади. Жорий йилнинг 8 январида Хокинг 75 ёшини қаршилаган.