Samsung компаниясининг кейинги флагманлари бўлиши кутилаётган Samsung Galaxy S8 самарадорлик бўйича жаҳон рекордини ўрнатиб, бу борада пешқадам бўлган iPhone 7 Plus’ни ортда қолдиришга эришди, деб ёзади Terabayt сайти.

Мобиль алоқа воситалари платформасининг самарадорлигини баҳолайдиган AnTuTu бенчмаркида «Samsung Galaxy S8» номи билан синовдан ўтказилган тестда жанубий кореялик илғор смартфон 205 284 балл тўплаган. Бу борада «улоқ»қа эга бўлиб келган америкалик iPhone 7 Plus 184 981 балл тўплаган эди.

Маълумотларга кўра, гаджетда қайси процессор – Snapdragon 835 ёки Exynos 8895 ўрнатилгани маълум эмас.

29 март куни Нью-Йоркда тақдимоти бўлиши кутилаётган Samsung Galaxy S8’нинг қуйидаги янги суратлари таниқли таҳлиличи Эван Бласс томонидан бугун, 20 март куни тарқатилган.

Таҳлилчининг фикрича, Samsung Galaxy S8 ва S8 Plus уч талқиндаги корпусда ишлаб чиқарилади: қора осмон, кул ранг орхидея ва кумуш ранг арктика. Эван Бласс, шунингдек смартфон нархалри ва аксессуарларига ҳам ойдинлик киритди. Унга кўра, Galaxy S8 799 евро, Galaxy S8 Plus 899 евродан сотилади. Смартфон билан бирга, уни мониторга улаб, компьютерга айлантирувчи DeX станцияси ҳам 150 евродан сотувга чиқарилади. Galaxy S8’га мўлжалланган виртуал воқелик шлеми — GearVR 129 евродан, Gear360 қўшимча камераси 229 евродан сотилади.