2013 йилнинг июнь ойи. Россиялик ҳаккер, Невада ҳамда Калифорния штатларидаги электрон тижорат билан шуғулланувчи 3 та йирик компаниянинг тизимларини бузиб кириб маълумотларни ўғирлашда айбланаётган Алексей Белан Европада қўлган олингач, АҚШнинг ҳуқуқни ҳимоя қилувчи органларининг кўнгли хотиржам тортди. Аммо, бу хотиржамлик узоққа чўзилмади. Сабаби, хакер фуқаролигига кўра, Россия ихтиёрига топширилди. Бу ҳақда Terabayt сайти ёзмоқда.
Сан-Франциско Федерал суди хулосасига кўра, Россия Федерал Хавфсизлик хизмати Белан ва шу каби кибер-жиноятчилардан америкалик Интернет компанияларга кибер-жосуслик уюштириш, маълумотларни ўғирлашда фойдаланмоқда. Жумладан, Белан Yahoo! Inc. компаниясидан катта миқдордаги маълумотларни ўғирлашга ёрдам берган.
Шунингдек, АҚШда 2016 йилда ўтказилган президентлик сайловларига таъсир ўтказишда ҳам шундай ҳужумлардан фойдаланилган экан. Беландан ташқари Россиянинг Хавфсизлик бўйича хизматининг Дмитрий Докучаев ҳамда миллати қозоқ бўлган Карим Баратов исмли ходимлари ҳам кибер жиноятларга жалб қилинган.
2014 йилда ҳам Yahoo тармоқларидан хизматнинг 500 миллиондан зиёд фойдаланувчиларига оид маълумотлар ўғирлангани ҳисобига компания катта зарар кўрган ва компания бунда муайян ҳукуматнинг «қўли борлиги»ни айтган.
Хакерлар орасида «Магг» номи билан ҳам танилган Белан Латвияда туғилган бўлса-да, Россия фуқароси ҳисобланади. Бу ҳаккер Yahoo’нинг компьютер тармоқлари орқали компаниянинг электрон почталарни назорат қилиш марказига кирган аккаунтлар ҳақидаги маълумотларни ўғирлаган. Натижада, бу орқали йирик компания ва институтларнинг махфий ёзишмалари, долзарб маълумотлари ўғирланган. Ҳаккер томонидан ўғирланган электрон саҳифаларнинг маълумотлар базалари ёрдамида худди шу саҳифаларнинг сохта нусхалари тайёрланиб, Yahoo серверларига ҳужум уюштирилган. Бу эса хакерларга Yahoo’даги 6,500 профилга махфий калит ва фойдаланувчи номини кўрсатмасдан ҳам кириш, у ердаги контентларни ўқиш имконини берди.
Белан уни ёллаганларнинг пулларидан ташқари, ўғирланган электрон почталарга спам-реклама юбориш эвазига ҳам йирик компаниялардан катта ҳисобда пул олиб турган.
Дмитрий Докучаев Россия хавфсизлик хизматининг ахборот хавфсизлиги бўлинмасида ишлаган ва америкалик «ҳамкасблари» билан алоқадорликда гумон қилиниб, айни пайтда қамоқда ушлаб турилибди. Бу айб ўз исботини топадиган бўлса, ҳаккер 20 йилга озодликдан маҳрум этилади.
Россиялик номи чиққан ҳаккерлардан бири бўлган Баратов Торонтода истиқомат қилади. У фишинг орқали, яъни бўлажак «қурбонлари»нинг ижтимоий тармоқ ва почталарига фавқулодда ёлғон хабарлар юбориб, уларнинг почталари ва аккаунтларини вирусли файллар билан зарарлайди. Шу орқали улар тўғрисида маълумотларни олади. Жумладан, бу ҳаккер Google’нинг тармоғидаги 50 дан зиёд аҳамиятга эга бўлган почта тизимларини бузгани учун «ҳомийлари»дан катта миқдорда мукофот пули олган.
2017 йилнинг март ойида канадалик ҳуқуқни муҳофаза қилувчи органлар томонидан қўлга олинган Баратов устидан айни пайтда тергов ишлари амалга оширилмоқда. Карим Баратовнинг аниқ бир ишлаш жойи бўлмаса ҳам, унинг ҳашаматли уйда туриши, Aston Martin ва Mercedes каби қимматбаҳо машиналари борлиги аниқланган.
Россия президенти Владимир Путиннинг матбуот котиби Дмитрий Песков Bloomberg нашрига берган интервьюсида Yahoo билан боғлиқ кибер-жиниятчилик масаласида Россия ҳукумати ҳамкорликка тайёрлигини маълум қилган бўлса ҳам, Россия хавфсизлик хизмати бу борада амалий қадамни ташлагани йўқ. АҚШ Федерал Тергов бюроси эса бунга нисбатан Ер шари кичик бир макон экани, бу ҳаккерлар кун келиб қўлга олиниши бўйича барча чоралар кўрилишини маълум қилган. Экспертлар жаҳон миқёсида бу каби кибер жиноятчилик кўлами ошишини, интернет тармоғида эҳтиёткорлик билан ҳаракатланиш, ҳар кимга ҳам маълумотларни бермаслик, маълумот эвазига акция ва қизиқарли викториналарда иштирок этмаслик кибер ҳужумлардан ҳимояланишнинг ягона кафолати эканини айтишмоқда.