ВЦИОМ ижтимоий фикрни ўрганиш ташкилоти навбатдаги сўровнома натижаларини эълон қилди, дея хабар бермоқда Russian Today телеканали.

Социологик тадқиқотлар билан шуғулланувчи ВЦИОМ давлат тасарруфидаги ташкилот ҳисобланади. Сўровнома Кремл олиб бораётган ҳозирги ташқи сиёсатга аҳолининг муносабатини ўрганишни мақсад қилган.

Сўровномада қатнашганларнинг ҳар тўрттадан уч нафари ҳукумат олиб бораётган ташқи сиёсатни қўллаб-қувватлашини маълум қилган. Уларнинг фикрича, Россия ҳукумати иқтисодий санкциялар туфайли ғарб билан муросасизлик сиёсатидан воз кечмаслиги керак. Мазкур фикрни қўллаб-қувватлаганлар санкциялар ҳар икки тарафга зарар етказаётгани ва охир-оқибат бекор қилинишига ишонишларини айтишган.

Кремл сиёсати тарафдорлари санкциялар олиб ташланиши учун Россия курашиши керак эмас, деб ҳисоблашади. Сўровнома иштирокчиларининг 75 фоизининг фикрича, санкцияларни жорий қилганлар ўзлари бекор қилишга мажбур бўлишади. 2015 йилги сўровномада 59 фоиз қатнашчилар бу фикрни қўллаб-қувватлашини маълум қилган эди.

Маълум бўлишича, фақатгина 18 фоиз россияликлар санкциялар мамлакат иқтисодиётига жиддий зарар етказди ва уларни бекор қилиш учун Путин чоралар кўриши керак, деб ҳисоблайди. Бу кўрсаткич 2015 йилда 33 фоизни ташкил қилган эди.

Бундан ташқари, сўровнома иштирокчиларининг 59 фоизи мавжуд ташқи сиёсат, жумладан, Украинага нисбатан олиб борилаётган сиёсатни давом эттириш учун иқтисодий қийинчиликларга сабр қилишга тайёрлигини маълум қилган. 34 фоиз аҳолининг фикрича, амалдаги сиёсатнинг тўлови Россия учун жуда қимматга тушади.

Россия ҳукумати иқтисодий санкциялар масаласида ўзгариш бўлмаслигини маълум қилган. Путин маъмурияти санкциялар қўллаш сиёсатини давом эттиришни истамоқда. Россияга қарши ғарб давлатларининг иқтисодий санкциялари 2014 йилда Қримнинг Россия таркибига қўшиб олиниши ортидан жорий қилинган эди. АҚШнинг янги ҳукумати мавжуд санкциялар ўз кучида қолишини маълум қилган.