Ўтган ҳафтада АҚШ ҳукумати Башар Асад ҳукуматини йўқотиш вазифаси кун тартибидан олиб ташлангани ҳақида баёнот берган эди. Guardian​ нашри хабар беришича, Доналд Трампнинг Сурия президенти ҳақидаги ижобий фикрлари тескари томонга ўзгарган.

АҚШ президенти Суриянинг Идлиб вилоятида амалга оширилган заҳарли газ ҳужуми учун Обама сиёсатини айблагани ҳақида хабар берган эдик. АҚШ ҳукумати эълон қилган баёнотда аввалги президентнинг Суриядаги сиёсати танқид қилинган эди.

Доналд Трамп 70 нафардан ортиқ одам ҳалок бўлган ва юзлаб кишилар заҳарланган ҳужумни «инсоният учун ҳақорат» деб атаган. Чоршанба куни Иордания подшоси Қирол Абдуллоҳ билан ўтказилган қўшма матбуот анжуманида кимёвий қурол ҳужуми унга қаттиқ таъсир қилганини маълум қилган.

«Сизга шуни айтишим мумкинки, сешанба куни болаларга қилинган ҳужум менга жуда қаттиқ таъсир қилди. Менинг Сурия ва Башар Асадга нисбатан муносабатим бутунлай ўзгарди…», – деб айтган АҚШ президенти журналистлар билан суҳбатда.

Трамп кимёвий қурол ҳужумини «чегарадан чиқиш» деб атаган ҳамда бегуноҳ гўдаклар ва болаларнинг ўлимидан қайғуда эканлигини маълум қилган. Башар Асадни ҳарбий куч ишлатиш йўли билан ҳокимиятдан ағдариш режаси бор-йўқлиги ҳақидаги саволга жавоб берар экан, президент ўз режалари билан ўртоқлашишни истамаслигини айтган.

АҚШнинг БМТдаги элчиси Никки Ҳейли Россия газ ҳужуми учун жавобгарликдан қочиб қутула олмаслигини айтиб, огоҳлантирган. Америкалик дипломат Сурияда тинчлик ўрнатиш Башар Асад, Россия ва Эроннинг манфаатларига тўғри келмаслигини маълум қилган.