Нью-Йорк полицияси АҚШ президентига қарашли Tramp Tower минораси олдида норозилик намойишлари ўтказганларни ҳибсга олди, дея хабар бермоқда Reuters агентлиги.

Пайшанба куни Нью-Йорк марказида намойишга чиққан кишилар президентнинг бизнес империяси марказий биносининг кириш қисмини тўсиб қўйишган. Намойишчилар Доналд Трампнинг АҚШга айрим мамлакат фуқароларини тақиқлашга оид қарори, муҳожирларни депортация қилиш ва Мексика билан чегарада девор қуриш сиёсатини бекор қилишган
.
Президент сиёсатидан норози кишилар осмонўпар минора лифтларини тўсиб қўйишгач, оғир қуролланган полиция бўлинмалари намойишни тарқатишга жалб қилинган. Полиция жами 25 кишини қўлга олгани айтилмоқда. Уларга қарши жиноий иш қўзғатилиши мумкин. АҚШ қонунларига кўра, хусусий мулк бўлган ҳудудда норозилик акцияси ўтказиш тақиқланади.

Trump Tower минораси президент Трампга қарашли компанияларнинг асосий штаб-квартираси ва офислари жойлашган маскан ҳисобланади. Доналд Трамп Оқ уйда истиқомат қилгани ҳолда, унинг оила аъзолари, жумладан Американинг биринчи хоними Мелания ва унинг ўғли Баррон Трамплар Нью-Йоркдаги осмонўпар минорада яшашади. Ўтган йилнинг ноябрь ойида бўлиб ўтган сайловдан кейин бошланган намойишлар туфайли Нью-Йорк полицияси янги сайланган президент ва унинг оила аъзолари хавфсизлигини сақлаш учун кучайтирилган чоралар кўришга мажбур бўлган эди.