Сурияда АҚШ бошчилигидаги халқаро коалиция иттифоқчи мухолифат вакилларини нишонга олди, дея хабар бермоқда Russian Today нашри.

АҚШ марказий қўмондонлиги (CENTCOM) хабар беришича, 11 апрел куни ИШИДга қарши курашаётган коалициянинг ҳаво ҳужумлари туфайли «Сурия демократик кучлари» сафида бўлган камида 18 киши ҳалок бўлган. Пентагон эълон қилган баёнотда, Америка ҳарбийлари хатолик туфайли иттифоқчиларни нишонга олишган.

“11 апрел куни Суриянинг Табқа шаҳри жанубида ИШИДга қарши курашаётган иттифоқчи кучларг акўмак сифатида коалиция томонидан амалга оширилган ҳаво ҳужуми «Сурия демократик кучлари»нинг 18 нафар аъзоси ўлимига сабаб бўлди”, – дейилади CENTCOM баёнотида.

Баёнотда ҳаво зарбаси «иттифоқчи қўшинлар сўровига биноан ИШИД позицияларини йўқ қилиш учун амалга оширилгани» қайд этилган ва ҳалок бўлганларнинг оилаларига учун «чуқур ҳамдардлик» изҳор қилинган. Пентагон, шунингдек, бундай фалокатлар келажакда қайта содир бўлмаслиги учун зарурий чоралар кўрилишини маълум қилган.

Фожиа содир бўлган Табқа шаҳри ИШИДнинг асосий таянч маркази ва норасмий пойтахти ҳисобланган Раққадан 55 км масофада жойлашган. Табқа шаҳрида АҚШ дастагидаги «Сурия демократик кучлари» ва ИШИД ўртасида кураш кетмоқда. «Сурия демократик кучлари» 2015 йилда вашингтон кўмагида ташкил қилинган, араб ва курдларидан иборат тузилма бўлиб, ҳам ИШИД, ҳам Сурия ҳукуматига қарши тузилма ҳисобланади. Гуруҳда курд жангарилари сон ва куч жиҳатдан етакчилик қилади.

АҚШ армиясининг бу каби «хато»лари тез-тез содир бўлиб туради. 2016 йилнинг майида америкалик ҳарбийлар адашиб ўзлари тайёргарликдан ўтказган исёнчи гуруҳлардан бирига зарба берган эди. Кейинроқ – ўтган йилнинг ноябрь ойида ИШИДга қарши ҳарбий ҳаракаталр пайтида Америка бошчилигидаги коалиция қўшинлари Дайр аз-Зордаги Сурия армиясини нишонга олган. Пентагон мазкур хатога «инсон омили» сабаб бўлганини маълум қилган.