Волгоград вилоятида терговчилар ўзбекистонлик ишчининг ўлими тафсилотларини ўрганмоқда. Бу ҳақда Россия тергов қўмитасининг Городишенский туманидаги бўлими раҳбари Михаил Сверкунов маълум қилди, дея хабар беради «Интерфакс».
Аниқланишича, 21 ёшли ўзбекистонлик йигит Волгограддаги пиёзни қайта ишлаш омборхонасида ишлаган. Иш қилаётган вақтида йигит Иккинчи жаҳон уруши давридан қолиб кетган снарядга кўзи тушган. Унга қизиқиши ортган йигит кутилмаган портлаш қурбонига айланди.
Терговчилар йигитни эҳтиётсизлик сабаб юзага келган портлаш оқибатида олинган тан жароҳати туфайли ўша оннинг ўзида жон берганини хулоса қилишди. Айни вақтда текширувлар давом этмоқда.