Куба ва Марокаш 37 йил аввал узилган дипломатик алоқаларни тиклашди. 21 апрель куни тегишли келишувни имзолаш маросими бўлиб ўтди. Бу ҳақда Radio Havana радиостанцияси хабар бермоқда.
Тегишли келишувларни имзолаш маросими Кубанинг БМТдаги доимий ваколатхонаси (Нью-Йорк шаҳри)да бўлиб ўтди. Ҳужжатлар икки мамлакатнинг халқаро ташкилотдаги доимий вакиллари — Анаянси Родригес ва Умар Ҳилолий томонидан имзоланган.
Радиостанция маълумотларига кўра, икки мамлакат ҳукуматлари дўстлик муносабатларини ривожлантириш ва сиёсий, иқтисодий, маданий ва бошқа соҳалардаги ҳамкорликни ривожлантириш истагини билдирган.
Марокаш қироллиги Куба Ғарбий Сахара мустақиллиги учун курашган ПОЛИСАРИО фронти томонидан 1976 йилда эълон қилинган Сахара араб демократик республикасини тан олгандан кейин Кубадаги элчихонасини ёпганди. Марокаш Ғарбий Сахарани ўзининг ажралмас қисми деб ҳисоблаб келади ва унга қироллик таркибида кенг мухторият тақдим қилишгагина йўл қўяди.