АҚШ Федерал сайлов комиссияси ҳисоботига кўра, Доналд Трампнинг қасамёд маросими учун россиялик олигархлардан бир неча миллион долларлик маблағлар келиб тушган. Бу ҳақида Quartz  нашри хабар бермоқда.

Доналд Трампнинг қасамёд маросимини ўтказиш қўмитаси Россияда туғилиб, АҚШга кўчиб борган Александр Шусторовичдан 1 миллион долларлик маблағни қабул қилган. «Pleiades group» компанияси асосчиси 2000 йилда Жорж Бушнинг сайловолди компанияси учун 250 минг доллар сарфламоқчи бўлган, аммо унинг Россия ҳукумати билан алоқалари сабаб Республикачилар партияси пулни олишдан бош тортган.

Шусторовичнинг ўзи 2012 йилда берган интервьюсида Россия президенти Владимир Путин ва бош вазир Дмитрий Медведев билан яхши алоқаларга эгалигини айтган. Шусторович 2005 йилда Санкт-Петербург собиқ мэри Анатолий Собчакнинг қизи Ксения Собчак билан унаштирилган, эълон қилинмаган сабабларга кўра никоҳ амалга ошмай қолган.

Бундан ташқари, инауграция қўмитасига келиб чиқиши россиялик бўлган миллиардер Лен Блаватникдан ҳам бир миллиард доллар келиб тушган. «Access Industries » компанияси асосчисининг Россияда ҳам кенг қамровли бизнес фаолияти билан шуғулланиши маълум. 2015 йилда Sunday Times нашри Лен Блаватникни Буюк Британиянинг энг бой кишиси сифатида эътироф этилган бўлса, Forbes рейтингида дунё бойлари орасида 16 ўринда қайд этилган.

Трампнинг қасамёди учун жами 106 миллион доллар тўпланган. Солиштириш учун, 2009 йилда Барак Обама учун 53 миллион доллар йиғилган эди.