БМТ бош котиби Антониу Гутерриш КХДРнинг ядровий фаоллигига қарши қаратилган ҳаракатлар қуролланиш пойгасини келтириб чиқариши мумкинлигидан огоҳлантирди.

«Мен минтақада ҳарбий кескинлик юзага келиши мумкинлигидан хавотирдаман. Хусусан, мен КХДРнинг фаолиятига қарши курашиш бўйича саъй-ҳаракатлар қуролланиш пойгасига олиб келиши мумкинлигидан ташвишдаман», — деди у.

Associated Press’нинг хабар қилишича, Қўшма Штатлар 28 апрель куни БМТ ХКни КХДР бўйича йиғилиш ўтказишга ва Шимолий Кореяга ядро қуролини яратиш дастури туфайли иқтисодий босимни кучайтиришга чақирди.

ХК вазирлар даражасидаги йиғилишида АҚШ давлат котиби Рекс Тиллерсон иштирок этиши кутилмоқда. Шунингдек у бу учрашувдан аввал Япония ва жанубий кореялик ҳамкасблари билан КХДР бўйича музокаралар олиб боради.

Аввалроқ АҚШ президенти Дональд Трамп КХДР билан жиддий ҳарбий ихтилоф рўй бериши мумкинлигини истисно этмагани ҳақида хабар бергандик.