Шимолий Корея 29 апрелда навбатдаги маротаба, тахмин қилинишича, баллистик ракетани синовдан ўтказди, бу апрель ойи бошидан бери КХДР ўтказган учинчи ракета синовидир. Бу ҳақда Жанубий Кореянинг "Рёнхап" ахборот агентлиги хабар бермоқда. 

Ракета учирилгани ҳақидаги ахборотни АҚШ Қуролли кучларининг Тинч океани бўйича қўмондонлиги ҳам тасдиқлаган. Америка ҳарбийларининг таъкидлашича, ракета стартдан кўп ўтмай ҳавода портлаб кетган, унинг бўлаклари Шимолий Корея ҳудудига, Пукчан аэропортидан 35 километр масофада қулаган.

Ракета синовини АҚШ, Жанубий Корея, Япония вакиллари қоралаб чиқди. КХДРда синов ўтказилгани ҳақидаги ахборот пайдо бўлганидан сўнг, Японияда хавфсизлик чоралари кучайтирилди, хусусан, Токио метросининг бир қатор йўналишларида ҳаракат тўхтатилди.

Ракета учирилишига АҚШ президенти Дональд Трамп тезкорлик билан муносабат билдирди. У твиттерда " Шимолий Корея ракетани учириб, Хитой ва унинг президенти истакларига беписанд муносабатда бўлганини" ёзди ҳамда "Бу жуда ёмон!", деб қўшимча қилди.

Янги ракета синови муносабати билан АҚШ Пхеньянга қарши санкцияларни кучайтириш бўйича ишларни тезлаштириб юбориши мумкин.

Бундан ташқари, ракета синови Трампнинг янги лавозимда бўлишининг 100 кунига "атаб" ўтказилган бўлиши мумкинлиги истисно қилинмаяпти. АҚШ сиёсий маданиятида муҳим аҳамиятга эга бўлган бу муддат 29 апрелда тугайди. Бу вақт ичида Трамп ва унинг маъмурияти Шимолий Кореяга нисбатан бир қатор кескин баёнотлар билан чиқди.