АҚШ президенти Дональд Трампнинг Пенсильвания штатидаги митингда чиқиши чоғида номаълум шахс ҳавога Россия байроқларини отди. Бу ҳақда The Hill нашри хабар бермоқда.

Байроқчалар Трамп ўзининг машҳур сайловолди шиори – "Яна Американи буюк қиламиз" ("Make America great agaian") иборасини айтиши билан улоқтира бошланган. Буни амалга оширган кимса шундоқ Трампнинг рўпарасида жойлашгани сабаб бу ҳолат кўплаб камералар томондан қайд қилинди. 

«Трампнинг чиқиши давомида кимдир камералар олдида ҳавога Россия байроқларини отди», — деган ёзув қолдирди Twitter’даги саҳифасида CNBC телеканали журналисти Стивен Копак.

Пенсильваниядаги митинг Трамп президентлигининг 100 кунига бағишланди. У маъмуриятининг илк юз кунини «мамлакат тарихидаги энг муваффақиятлиси» деб атади.

Шунга ўхшаш ҳолат февралда ҳам юз берганди. Ўшанда Трамп нутқ сўзлаши режалаштирилган анжуманда меҳмонларга Россия байроқчалари тарқатилган. Кейинроқ маълум бўлишича, бу акцияни Аmericans Take Action ҳаракати фаоллари ташкиллаштирган. Улар Трампни ўз давлатини сотганликда айблаб, унинг зудлик билан истеъфога кетишини талаб қилишган.