БМТнинг душанба куни берган маълумотига кўра, Жанубий Судандаги уруш ва зўравонлик туфайли миллиондан зиёд бола мамлакатни тарк этишга мажбур бўлган, дея хабар беради «ТАСС».

Бошқарманинг охирги маълумотларига кўра, болалар Жанубий cуданлик 1,8 миллиондан ортиқ қочоқнинг 62 фоизини ташкил этади. Уларнинг аксарияти Уганда, Кения, Эфиопия ва Суданда бошпана изламоқда.

Мамлакатнинг ўзида можаро бошидан бери мингдан ортиқ бола ўлдирилди ёки жароҳатланди. 1,14 миллион бола эса уйини тарк этишга мажбур бўлди.

ЮНИСЕФ жанубий суданлик болаларга ёрдам кўрсатиш учун зарур 782 миллион долларнинг 181 миллион доллари йиғилганини маълум қилган. 

Маълумот учун, Жанубий Судан 2011 йилда мустақилликни қўлга киритган, бироқ икки йилдан сўнг янги можаро авж олган - президент Сальва Киир ўзининг собиқ депутати Рик Мачарни ҳарбий тўнтарув режалаштиришда айблаган. Уруш кенг тарқалиб, мамлакатни этник белгилар бўйича ажратган ва баъзи ҳудудларда очлик юзага келишига сабаб бўлган.