Жанубий Корея президентлигига янги сайланган Мун Же Ин бугун парламент олдида қасамёд қилди, дея хабар бермоқда Yonhap​ агентлиги.

Мун Же Ин 9 май куни бўлиб ўтган сайловда 41,1 фоиз овоз билан ғалаба қозонган эди. Олдинги сайловлардан фарқли равишда, янги президентнинг ваколат муддати сайлов натижалари эълон қилинган вақтдан бошланди. Мун Же Ин президент сифатида илк вазифасини мамлакат қуролли кучлари раҳбари, армия генерали Ли Сун Жин билан телефонда мулоқот қилишдан бошлаган.

Янги президент қасамёд қилишдан аввал Сеул миллий қабристонидаги ўз ўтмишдошлари – Кореянинг тарихда ўтган ҳукмдорлари ва уруш қаҳрамонларини зиёрат қилган. Парламент вакиллари олдида қасамёд қилар экан, Мун Же Ин бутун корейс халқининг президенти бўлишга ваъда берган.

Янги президент давлат мулозимлари мамлакатнинг барча ҳудудларидан фақатгина қобилиятлари ва муносиблигига кўра тайинлашини билдирган. Шимолий Корея масаласига тўхталар экан, Мун Же Ин КХДРнинг ядровий синовларини тўхтатиш учун, керак бўлса, Пхенянга боришини маълум қилган.

«Зарур бўлса, тўппа-тўғри Вашингтонга учаман. Пекин ва Токиога, вазият тақозо қилса, ҳаттоки Пхенянга ҳам бораман», – деб айтган Мун Же Ин.

Эяда муддатидан аввал президентлик сайлови шу йилнинг 10 март куни собиқ президент Пак Кин Ҳе коррупцион айбловлар билан истеъфога чиқарилиши ортидан бўлиб ўтди. Собиқ президент ҳозирда ҳибсда сақланмоқда. Мун Же Ин 5 йил давомида Жанубий Кореяни бошқаради. Мамлакат конституциясига кўра, бир шахс фақат бир марта президентликка сайланиши мумкин.