Сешанба куни Тошкентга келган даниялик архитектор Ян Гейл чоршанба куни архитекторлар ва талабалар учун замонавий жаҳон архитектураси тўғрисида қисқа семинар ўтказди.

Шунингдек у пойтахт ҳокими Раҳмонбек Усмонов ҳамроҳлигида Ҳазрати Имом мажмуасини кўздан кечирди, Темурийлар тарихи давлат музейи, Тошкент метроси ва «Қатағон қурбонлари» ёдгорлик мажмуига ташриф буюрди.

Шаҳар муҳити сифати ва жамоат жойларини лойиҳалаштириш масалалари бўйича жаҳонда тан олинган эксперт семинарда сўзга чиқар экан, унга бор-йўғи бир куни ўтган Ўзбекистон пойтахти ҳақида хулоса чиқаришга ҳали эрта эканини қайд этди. Бироқ кейинроқ дастлабки таассуротларини ўртоқлашди.

«Мен фақатгина бир нарсани айтишим мумкин, сизлар асфальтдан жуда кўп фойдаланар экансиз», — дея ўзининг илк таассуротини айтиб ўтди Ян Гейл.

«Агарда мен шаҳар мэри бўлганимда, мен асфальтларни олиб ташлаган, кўчаларни жамоатчилик учун масканга айлантирган бўлардим», — деди у.

«Менга авваллари Тошкентда тирбандликлар жуда кам бўлганини айтишди. Шаҳар ҳокими менга шундай рақамларни келтирди: ҳар йили Тошкентда автомобиллар сони 35 мингтага кўпаяр экан. Сизни ишонтириб айта оламанки, тез орада Москва даражасига [тирбандликлар] етишасизлар, — деди архитектор.

«Ривожлантиришнинг муқобил стратегияси жуда ҳам муҳим», — дея қайд этди у.

«Газета.uz» мухбири саволига жавоб қайтарар экан, Ян Гейл келгуси куни у ва Тошкент ҳукумати билан қандай ҳамкорлик олиб борилиши маълум бўлишини таъкидлади.

Ўзининг 50 йиллик фаолияти давомида профессор Ян Гейл шаҳарларда одамлар учун жозибакор ва қулай муҳитни яратишга сезиларли таъсир кўрсатди. У Нью-Йорк, Копенгаген, Сидней, Лондон, Мельбрун ва бошқа шаҳарларда кўчалар ва жамоат жойларини қайта қуришдаги хизматлари учун кўплаб мукофотларга лойиқ кўрилган. Унинг муаллифлигидаги олтита асар, жумладан «Одамлар учун шаҳар» нашри 35 тилга таржима қилинган.