Миллиардер Алишер Усмонов «ВКонтакте» ижтимоий тармоғида мухолифатчи Алексей Навальнийга қаратилган 12 дақиқали видемурожаатни жойлаштирди. Бу ҳақда Meduza хабар бермоқда.

Мурожаат Усмоновнинг Навальнийга қарши суд даъвосига бағишланган бўлиб, унинг кўриб чиқилиши 18 май, пайшанба кунига белгиланган.

Роликда Усмонов Навальнийга «сен»лаб мурожаат қилган ва дастлаб мухолифатчининг у қамалиб чиққанлиги ҳақидаги сўзларига изоҳ берган. Миллиардерга кўра, собиқ Иттифоқ пайтида у чиндан ҳам қамоқда ўтирган, бироқ Навальнийдан фарқли равишда, унинг судлангани олиб ташланган. 

«Иккимиздан жиноятчи — сенсан», дейди шу муносабат билан Усмонов. 

Шунингдек, мухолифатчининг миллиардер Россияда солиқ тўламаслиги ҳақидаги даъвосини рад этиб, ўтган йилнинг ўзида 2,7 миллиард рубль солиқ тўлаганини билдирган. 

Алишер Усмонов қачондир кимгадир пора берганини инкор этган ва Навальнийнинг коррупцияга қарши кураш фондини бундай текширувларни «чуқурроқ ўтказиш»га чақирди.

"Лёша, сен кечирим сўрагин, илтимос. Ўз манфаатинг йўлида контекстдан бир-бирига тўғри келмайдиган фактларни юлиб олишни бас қил. Сенга ўхшаганлар икки дунёда ҳам менинг ҳамма нарсани бепул олган ўғри, жиноятчи эканлигимни исбот қила олмайди. Чунки мен, сендан фарқли ўлароқ, қадрдоним, мен ҳаммаси учун меҳнатим, иқтидорим ва ҳалоллигим билан ҳақ тўлаганман. Ва шунинг учун барибир менинг олдимда ҳаммаси учун жавоб беришга тўғри келади, Лёша. Ва мен учун мана шу видеони томоша қилаётган одамлар, мен, Алишер Усмонов ҳалол тадбиркор, ҳалол инсон эканлигимни билишлари жуда муҳим. Сенга ўхшаганларнинг мақсади эса, Алексей Навальный, — қўлидан ўғирликдан бошқа ҳеч нарса келмайдиган Россия тадбиркори образини яратишдир. Ва бу ҳам ёлғон. Сенинг менинг устимдан мағзава ағдариш учун чиранишларинг эса — Моськанинг филга акиллашидан бошқа ҳеч нарсамас. Туф сенга, Алексей Навальный!", — дея ўз видеомурожаатини мана шундай эмоционал нуқтада тугатган Алишер Усмонов.