АҚШ президенти оммавий ахборот воситаларида ўзи ҳақида билдирилаётган фикрларга ўз муносабатини билдирди. Independent нашри хабарига кўра, Трамп ўзига нисбатан қилинаётган муомаладан норози.
Сўнгги бир ҳафта давомида Америка жамоатчилиги ва сиёсатчилари орасида Доналд Трампга нисбатан норозилик кучаймоқда. Ўтган ҳафтада Федерал қидирув бюроси раҳбари бўшатилиши ортидан бошланган норозилик тўлқини Жеймс Комининг қайдлари ва Россия ташқи ишлар вазирлигига махфий маълумотлар тортиқ қилингани тўғрисидаги хабарлар чиқиши ортидан кенг қулоч ёйди.
Жорий ҳафтада Коннектикут штатидаги АҚШ Соҳил қўриқчилари академиясига ташрифи чоғида президент Америка матбуотидан очиқчасига «нольиган».
«Менга яқинда матбуот томонидан кўрсатилган муносабатни қаранг», – дея хитоб қилган Доналд Трамп академия битирувчиларига қарата. «Комил ишонч билан айта оламанки, тарихда бирор сиёсатчига бундан ёмонроқ ва адолатсизроқ муносабат кўрсатилмаган. Уларга сизни ерга уришларига имкон бермаслик керак», – деб айтган Оқ уй раҳбари ўз нутқида.