КХДРнинг БМТдаги элчиси ўринбосари ўтган ҳафтада дунёни ларзага солган киберҳужумларга Шимолий Корея алоқадор бўлиши мумкинлиги ҳақидаги хабарни «кулгили» деб атади. Бу ҳақида Reuters​агентлиги хабар бермоқда.

Матбуот анжуманида глобал киберҳужумлар, жумладан, БМТга қилинган хакерлик ҳужуми ҳақида сўралган саволга Ким Ин Рёнг қуйидагича жавоб берган: “Киберҳужумлани КХДР билан боғлаш – бемаънилик. Қачонки бирор ноодатий ҳодиса юз берса, АҚШ ва бошқа адоват руҳидаги кучлар буни КХДРГа боғлаб, бизга қарши шаллақиларча аксил-кхдр тарғиботини бошлашлари одатий ҳол”.

Эслатиб ўтамиз, ўтган ҳафтанинг жума куни дунё кенг қамровли киберҳужумларга дучор бўлган эди. WannaCry​ вирусидан фойдаланган хакерлар компютерларни қулфлаб, файлларни очиш учун пул талаб қилишган. Ҳозиргача дунёнинг 150 та мамлакатида 300 мингдан ортиқ компютерлар мазкур ҳужумдан зарар кўрган.

Душанба куни Россиянинг “Kasperskiy лабораторияси” фирмаси WannaCry​ дастурида ишлатилган кодларнинг, мутахассислари Шимолий Кореяга алоқадор бўлган Lazarus Group​ хакерлик гуруҳи дастурларида ишлатилгани ҳақида маълум қилган эди.