АҚШ президенти Дональд Трамп Саудия Арабистонига ташриф билан келди.  Бу ҳақда The Washington Post нашри хабар берди.

АҚШ етакчисининг самолёти Ар-Риёд аэропортига келиб қўнди. АҚШ президенти сифатида илк хорижий сафарини амалга ошираётган Трампни аэропортда Саудия Арабистони қироли Салмон ибн Абдулазиз Ас-Сауд кутиб олди.

Трамп хорижий сафари давомида Исроил ва Ватиканга ҳам боришни режалаштирган. Бундан ташқари, у НАТОнинг Брюсселдаги йиғилишида қатнашмоқчи ва Сицилияда “катта еттилик” давлатлари етакчилари билан учрашишни мақсад қилган.

Америка ОАВларининг қайд этишича, ташрифнинг қизиқарли жиҳатларидан бири Трампга ҳамроҳлик қилаётган аёлларнинг ташқи кўриниши бўлади: мусулмон одатларига кўра аёллар жамоатга кўриниш берганида бошига рўмол ўраган бўлиши лозим.

Трампдан олдинги АҚШ президенти Барака Обаманинг рафиқаси Мишель давлат ташрифи вақтида боши очиқ ҳолда келгани Саудия Арабистони фуқароларининг норозилигига сабаб бўлганди. Мелания Трамп ҳам Саудияга рўмолсиз келди.

Аввалроқ Ўзбекистон президенти Шавкат Мирзиёев 21 май куни Саудия Арабистони қироли Салмон ибн Абдулазиз ал-Сауднинг таклифига биноан Араб-мусулмон мамлакатлари ва Америка Қўшма Штатлари саммитида иштирок этиши ҳақида хабар бергандик.