Филиппин президенти Родриго Дутерте Россия Федерациясига ташрифини муддатидан олдин тугатиш ва ватанига қайтишига тўғри келди, дея хабар бермоқда Guardian​ нашри.

Дутертенинг Россия Федерациясига беш кунга мўлжалланган ташрифи душанба куни бошланган ва пайшанба куни Владимир Путин билан учрашув белгиланган эди. Аммо Филиппин жанубидаги Марави шаҳрида исёнчилар билан содир бўлган тўқнашувлар сабаб ҳудудда ҳарбий ҳолат эълон қилинган.

Путин ва Дутертенинг учрашуви муддатидан аввал – сешанба куни бўлиб ўтган. Дутертенинг матбуот котиби Эрнесто Абелла президент зудлик билан Филиппинга қайтишга қарор қилганини маълум қилган.

Маълум бўлишича, сешанба куни Филиппиннинг Минданао оролида юз нафарга яқин исёнчилар хавфсизлик кучларига ҳужум қилган. Қуролли тўқнашув туфайли ҳукумат кучларидан 3 киши қурбон бўлгани ва 12 киши яралангани хабар қилинган. Жангарилар ИШИДнинг Филиппиндаги тармоғи сфатида кўриладиган Абу Сайёф гуруҳи аъзолари бўлиши тахмин қилинмоқда.

АҚШнинг собиқ президенти Барак Обамага қарши ҳақоратли сўзлари билан танилган Родриго Дутерте Владимир Путинни ўзининг «севимли қаҳрамони» деб билишини бир неча бор таъкидлаган эди. Путин Дутерте билан илк бор ўтган йилнинг ноябрь ойида Лимадаги халқаро саммитда учрашган ва уни Россияга таклиф қилган эди.