1977-1981 йилларда АҚШ президенти Жимми Картернинг миллий хавфсизлик бўйича ёрдамчиси лавозимида ишлаган Збигнев Бжизинский жума куни 89 ёшида вафот этди. Бу ҳақда Американинг Fox News телеканали хабар берди.

Politico газетасининг ёзишича машҳур сиёсатшуноснинг қизи “Отам бугун осойишталик билан нариги дунёга равона бўлди”, деб кеча ахборот берган. The New York Timesнинг ёзишича, Бжезинский Виржиния штатидаги шифохонада кўз юмган.

Келиб чиқиши поляк бўлган Збигнев Бжезинский Америка ташқи сиёсатининг етакчи идеологларидан бири саналади.

Умрининг сўнгги йилларида у бир қатор жамоатчилик ташкилотларига раҳбарлик қилган, сиёсий дастурларни олиб борган, таълим ишларида фаоллик кўрсатган, Вашингтондаги стратегик ва халқаро тадқиқотлар Марказининг эксперти саналган. Йирик сиёсатдонлар, банкирлар, трансмиллий корпорациялар, иқтисодчилар ва сиёсатдонларни ўзида жамлаган “Билдерберг клуби”нинг доимий аъзоси ҳисобланган.

Бжезинский, бундан ташқари, “Буюк шахмат тахтаси: Америка ҳукмронлиги ва унинг геостратегик талаблари” (1997) асари билан ҳам машҳурдир. Дунё сиёсати масалаларини кенг кўламда таҳлил қилган ушбу асарни олим Озод Шарафиддинов ўзбек тилига таржима қилган.