Ўзбекистон Президентининг 18 майдаги қарорига (PDF) мувофиқ, Тошкентда кичик саноат зоналари ташкил этилади.

Кичик саноат зоналари ҳудудида жойлашган ишлаб чиқариш майдончалари ва ер участкалари тадбиркорлик субъектларига келгусида яна 10 йилга узайтириш имконияти билан имтиёзли ижара тўлови ставкалари бўйича тақдим этилади.

Кичик саноат зоналари ҳудудларида тадбиркорларга давлат хизматларини кўрсатиш учун «ягона дарча» марказлари очилади. Шунингдек, иштирокчиларга маҳсулотларини экспорт қилишда кўмаклашиш учун Кичик бизнес ва хусусий тадбиркорлик субъектлари экспортини қўллаб-қувватлаш жамғармаси ваколатхоналари ҳамда мини банклар фаолияти йўлга қўйилади.

Ҳужжатга мувофиқ, Тошкентда кичик саноат зоналари Кафолат жамғармаси ташкил этилади. У, хусусан, Ўзбекистон Тикланиш ва тараққиёт жамғармасининг 50 млн АҚШ доллари миқдоридаги бир марталик улуши ҳисобидан шакллантирилади.

Кичик саноат зоналари иштирокчиларига имтиёзлар қўлланилади. Улар икки йил муддатга мол-мулк ва юридик шахсларга солинадиган даромад солиғидан озод қилинади. Имтиёзлар ишлаб чиқарилган умумий маҳсулотларнинг 30 фоизи экспорт қилинган тақдирда, қўшимча равишда яна икки йилга узайтирилади. Иштирокчилар имтиёзларга эга бўлиш учун энг кам ойлик иш ҳақининг 3000 баробари миқдорида инвестиция киритишлари талаб қилинади.

Ҳозирда Юнусобод, Сергели ва Яккасарой туманларидаги фойдаланилмаётган корхоналар негизида кичик саноат зоналари ташкил этилган бўлиб, уларнинг ҳудудида тўқимачилик, кимё, озиқ-овқат, электротехника маҳсулотлари, мебель, қурилиш материаллари ва бошқа маҳсулотларни ишлаб чиқарувчи 513 та кичик корхона фаолият кўрсатмоқда. 2016 йилда ушбу корхоналар томонидан 1,1 трлн сўмлик маҳсулотлар ишлаб чиқарилди, 140 млн АҚШ долларидан ортиқ қийматдаги товарлар экспорт қилинди, 11 мингдан зиёд иш ўринлари яратилди.