Душанба куни Россия Федерациясининг турли шаҳарлари бўйлаб ҳукуматга қарши норозилик намойишлари бўлиб ўтди. Reuters агентлиги мухолифат етакчиси Алексей Навалний томонидан ташкиллаштирилган аксил-коррупциявий намойишлар 2012 йилдан бери энг катта чиқишлар сифатида баҳоламоқда.

Таёқлар билан қуролланган полиция “Йўқолсин Путин”, «Россия эркин бўлиши керак» дея ҳайқираётган намойишчиларни тарқатиш учун анча тер тўкишига тўғри келган. Намойишчиларнинг аскарияти талаба ёшлардан иборат бўлгани айтилмоқда.

Март ойида ҳукуматга қарши рухсат берилмаган намойишни уюштиргани учун 15 суткага қамалган ва кейинчалик заҳарли суюқлик ҳужумига учраган Алексей Навалний кеча ноқонуний намойишга чорлагани учун 30 суткалик қамоқ жазосига ҳукм қилинган.

Март ойида бўлиб ўтган кенг қамровли намойишларда мингдан зиёд одамлар ҳибсга олинган эди. Душанба куни Москвада яна минглаб одамлар коррупцияга қарши намойишда қатнашган. Санкт-Петербургда нисбатан камроқ намойишчилар чиққан. Ички ишлар вазирлиги баёнотида Москвадаги намойишда 4 500 киши қатнашгани маълум қилинган. Мустақил кузатув гуруҳи маълумотларига кўра, Россия пойтахтида 730 киши ҳибсга олинган. Ички ишлар вазирлига хабарида Санкт-Петербургда 500 киши қўлга олингани қайд этилган.

Москва шаҳар раҳбарияти намойишга рухсат берилмаганини таъкидлаб, оммавий чиқишлар ноқонунийлигини эътироф этган. Хабарда айтилишича, полиция оломонга қарши кўздан ёш чиқарувчи газ ва резина таёқларни ишга солишга мажбур бўлган. Танқидчилар Россия давлат матбуоти намойишларни ёритишга унчалик эътибор бермагани ва Путиннинг давлат мукофотларини топшириш маросимини кўрсатишга асосий урғу берганига эътибор қаратишган.
41 ёшли Алексей Навалний бир неча йиллардан бери Россияда коррупцияни тугатиш учун курашиб келади. Унинг бош вазир Дмитрий Медведевга қарши коррупциявий айбловлари эълон қилинган видеоролик 22 миллион мартадан ортиқ томоша қилинган.