Янги Англия тиббиёт журнали (New England Journal of Medicine​) дунё аҳолисининг ортиқча вазнга эга бўлишига оид янги тадқиқот натижаларини эълон қилди.

Тадқиқотда 1990 2015 йиллардаги семизлик билан боғлиқ муаммолар ўрганилган. Натижалар шуни кўрсатдики, дунё бўйлаб 2,2 миллиард киши ёки дунё аҳолисининг 30 фоизи ортиқча меъёрдан ортиқча вазнга эга. Тадқиқотга кўра, 108 миллион болада семизлик касаллик даражасига чиққан бўлса, катта ёшдагиларда бу кўрсаткич 600 миллиондан ортиқни ташкил қилган.

Маълум бўлишича, семизликка чалиниш ҳолати 1980 йилдан бери икки маротаба ортган. Болалар ўртасида семизликнинг тарқалиши 5 фоизни ташкил қилса, катталар ўртасида бу кўрсаткич 12 фоизга етган.

2015 йилда дунёда 4 миллион киши семизлик билан боғлиқ касалликлар, жумладан юрак қон-томир ва буйрак касалликлари, шунингдек, саратоннинг кўплаб турлари туфайли ҳаётдан кўз юмган. Бу эса 1990 йилги кўрсаткич билан солиштирганда 28 фоизга кўпдир.

Тадқиқотчилар 195 мамлакатдаги маълумотларни ўрганиб чиқиб хулоса қилишларича, болалар ўртасида семизликка чалиниш тобора ортиб бормоқда. Семиз болалар сони бўйича АҚШ етакчилик қилган бўлса (13 фоиз), катталарнинг ортиқча вазнга эга бўлиши бўйича Мисрга тенг келадигани топилмаган (35 фоиз). Бангладеш ва Ветнам семизликка чалиниш борасида энг паст кўрсаткичга эга бўлган (1 фоиз).

БМТнинг Жаҳон озиқ-овқат дастури эълон қилган ҳисоботга кўра, дунёда 800 миллион киши тўйиб овқат емасликдан азият чекмоқда. Шундан 300 миллион нафари болалардир. Шу билан бирга дунёнинг бир неча мамлакатлари, жумладан, Яман, Сомали, Нигерия ва Жанубий Суданда оммавий очарчилик ҳукм сурмоқда. Умумий ҳисобда 20 миллиондан ортиқ одамга очлик туфайли ўлим хавф солмоқда.