Сюжоу шаҳридаги болалар боғчасида юз берган портлаш саккиз инсонни ҳаётдан олиб кетди. Sina интернет-порталининг ёзишича, пайшанба куни соат 16:50да мактабгача таълим муассасасининг ёнидаги тамаддихонада портлаш юз берган. Бу пайтда ота-оналар фарзандини боғчадан олаётган эди.
Нохуш ҳодиса оқибатида саккиз киши ҳалок бўлиб, 65 нафар одам яраланган, улардан етти нафарининг аҳволи оғир.
ТАСС ахборот агентлиги Хитой маҳаллий манбаларига асосланиб ёзишича, портлашга газ баллони сабабчи бўлган. Ҳозир жамоат хавфсизлиги вазири Го Шенкун раҳбарлигида текширув ишлари олиб борилмоқда. Синьхуа агентлиги ҳодиса натижасида жиноий иш қўзғатилиши мумкинлигини ёзди.