Бразилия федерал полицияси мамлакат президенти Мишел Темернинг тадбиркорлардан пора олганига доир далилларни қўлга киритганини эълон қилди, дея хабар беради Guardian​ нашри.

Мишел Темер коррупцион можаролар туфайли ўз лавозимини тарк этиши мумкин. Полиция бразилиялик бизнесмен, гўшт қадоқлаш билан шуғулланувчи ЖБС компанияси раҳбари Жоэсли Батистанинг кўрсатмаси билан президентнинг корупцияга алоқадорлигини ўрганаётган эди.

Президент ўзига қўйилган барча айбловларни рад этган ва истеъфога чиқишдан бош тортган. Агар мамлакат бош прокурори полиция келтирган далилни тасдиқлайдиган бўлса, президентга қарши жиноий иш очилиши масаласи Конгрессда кўриб чиқилади. Мамлакат қонунчилигига кўра, президент фақат Олий Суд томонидан тафтиш қилиниши мумкин. Мишел Темерни истеъфога чиқариш учун Конгресс аъзоларининг учдан икки қисми уни ёқлаб овоз бериши керак.

Полиция эълон қилган ҳисоботда айтилишича, Мишел темрнинг собиқ ёрдамчиси Родриго Роха Лоурес ЖБС компаниясидан президентнинг фойдасига пора олган. Олдинроқ эълон қилинган видеотасвирларда эса Лоурес ЖБС компаниясидан президентга жўнатилгани иддао қилинган, 150 минг доллар нақд пул солинган дипломатни кўтариб кетаётганини кўриш мумкин.

Полицияга кўра, президент ҳодиса бўйича терговчиалрнинг саволларига жавоб беришдан бош тортган. Мишел Темерга нисбатан коррупция, адолат қарор топишига тўсқинлик қилиш ва жиноий ташкилот аъзоси бўлишдан иборат учта жиноят бўйича айблов эълон қилиниши мумкин. Эслатиб ўтамиз, Бразилиянинг аввалги президенти Делма Руссеф ҳам коррупциявий можаролар ортидан 2016 йилда истеъфога чиқарилган эди.