Буюк Британиядаги Лейбористлар (меҳнаткашлар) партияси етакчиси Жереми Корбиннинг мамлакат раҳбари Қиролича Елизавета II қаршисида таъзим қилишдан бош тортиши турли мунозараларга сабаб бўлди. Russian Today​  телеканали хабар беришича, жаноб Корбин томонидан Британиянинг анъанавий қонунларига риоя қилинмаслиги биринчи марта содир бўлаётгани йўқ.

Чоршанба куни Жереми Корбин Буюк Британия парламентининг Лордлар палатаси йиғилишига бош вазир Тереза Мэй билан биргаликда кириб борар экан, қироличанинг нутқи олдидан унга таъзим қилишни “унунтган”. Бунинг ўрнига у бинодаги номаълум кузатувчига «сурбетларча кўз қисгани» айтилмоқда. Ҳамма қиролича қаршисида таъзим қилган пайтда у қаддини ғоз тутиб туриши бир қатор эътирозларга сабаб бўлган.

Ҳозирча лейбористлар етакчисининг монарх олдида таъзим бажо келтиришдан атайин ўзини олиб қочганми-йўқми, номаълумлигича қолмоқда. Корбиннинг ёрдамчилари унинг қиролича қаршисида таъзим қилмасдан монархга нисбатан ҳурматсизлик қилганини рад этишган.

Уларнинг фикрича, Лордлар палатаси спикери ва бошқа расмийлар барча парламент аъзолари номидан таъзим қилишган. Эълон қилинган видеотасвирда Корбиннинг орқасидан кирган Консервативлар партияси етакчиларидан Борис Жонсон ва Дамиан Грин ҳам қироличага таъзим қилмаганини кўриш мумкин.

Жереми Корбин аввалроқ бундай анъаналарга риоя қилмаслигини, аммо бош вазир лавозимига сайланадиган бўлган бўлса, монархия тузумини бекор қилиши мумкинлигини инкор қилган. Лейбористлар етакчиси 2015 йилда Махфий Кенгаш аъзолигига тайинланган пайтда қиролича олдида тиз чўкишдек анъанани бажаришдан бош тортган эди.

Яқинда Sky News'га берган интервьюси чоғида монархияни бекор қилиш режаси борлигини рад этган Корбин қиролича билан «жуда яхши суҳбат» қургани айтарккан, жумладан, шундай деб айтган: «У сиёсий муҳокамага олиб келиниши керак деб ўйламайман. Мен демократияга ишонаман ва биз демократик давлатда яшаймиз. Монарх – сиёсий ҳокимиятга эга бўлмаган рамзи давлат бошлиғи, холос».