Халқ таълими вазирининг янги тайинланган 23 ёшли ўринбосари Алишер Саъдуллаев ушбу лавозимнинг дастлабки кунларида нималар қилгани ва кейинги 100 кун ичидаги иш режалари ҳақида журналистлар билан ўртоқлашди. Ушбу учрашув 3 июль, Халқаро пресс-клубда бўлиб ўтди.
— “Камолот” ёшлар ижтимоий ҳаракатининг 30 июнь куни бўлиб ўтган қурултойи ёшлар учун том маънода муҳим воқеа бўлди. Бундан кейин Президент билан очиқ гаплаша оламиз, муаммоларимизни тўғридан-тўғри айта оламиз, улар бизнинг ишонган одамимиз бўлдилар. Кўпчиликда “Президент нега айнан бу йигитни танлади?”, “қайси кўрсатган каромати учун?”, деган саволлар туғилди. Президентимиз мени танлаб, ёшларни қўрқмасликка, ўз ғоя ва лойиҳаларини дадил айта олишга чақирдилар, деб ўйлайман. Кейинги йил мен шу вазифани оқласам, яна 10 нафар, балки ундан кўп ёш йигитлар чиқади. Шуни исботлаш учун мени танладилар.
“Ёшлар ўқишни тугатгач, уларга “энди нима иш қиласан?”, деган саволларни беришади. Менимча, ёшларга бундай босим ўтказиш эмас, аксинча уларни қўллаб -қувватлаш керак. Ва энди ўқишни тамомлаган биз ёшларда ҳам шундай саволга тутилганда иккиланишимиз, “энди кимни қўлида ишлайман?”, “нима иш қилсам экан?” деб ўйланишимиз керак эмас. Балки “қанча иш ўрни яратаман?” деб ташвишланишимиз керак. Биргина ёшни ажратиб, лидер қилиб қўйиб, вазифаларни фақат унга юклаб қўймасдан, ҳар биримиз бирлашишимиз зарур. Бунда албатта, катталарнинг тажрибасисиз ҳеч нарса қилиб бўлмайди. Бизга 24 соат ишлаш керак бўлса, 25 соат ишлаймиз, ҳаракат қиламиз”, - деди вазир ўринбосари.
Алишер Саъдуллаевнинг таъкидлашича, таълимни болалар боғчасидан бошлаш керак. “Халқ таълими вазирлиги тасарруфида 5 млн ёшлар бор. Шуларнинг 1 млни мактаб ўқувчилари, қолган 4 млни боғча болаларидир. Демак, боғчалардаги тизимга эътибор қаратиш лозим”, - дейди у.
100 кун ичида...
“Ҳали режаларим тўлиқ тузилмаган, бу Ёшлар иттифоқига ҳам боғлиқ. 100 кун ичида асосий қиладиган ишим, биринчи, боғчалардаги ҳолатларни ўрганиш, янги таълим тизимларини олиб кириш, синаб кўриш, вилоятлар бўйича шароитларни кўриш. Ўтган дам олиш кунлари Тошкент шаҳридаги 2 та мактабга бордим. Бири яхши, бири кўрсаткичлари ёмон мактабларни танладим. Бу уларни ўзаро таққослаш, муаммонинг негизи нимадалигини аниқлаш учун”
Алишер Саъдуллаевнинг айтишича, Халқ таълими вазири ўринбосари этиб сайлангач, ижтимоий тармоқлар орқали унга жуда кўп саволлар кела бошлаган. Шу боис у Фейсбукдаги аккаунтини ўчирган. Эндиликда виртуал қабулхона очишни режалаштирган.
Эслатиб ўтамиз, Тошкентдаги Сингапур менежментни ривожлантириш институтини тамомлаган Алишер Саъдуллаев 30 июнь куни Шавкат Мирзиёев иштирок этган «Камолот» қурултойида сўзга чиққан. Президентга Саъдуллаевнинг ғоялари ва ташаббускорлиги ёққан ва уни ХТВ вазири ўринбосари лавозимига таклиф қилган.