АҚШ давлат котиби Рекс Тиллерсон Суриядаги қуролли низони ҳал этиш учун Россияни ҳамкорликка чорлади, дея хабар бермоқда Associated Press​ агентлиги.

Давлат котиби эълон қилган баёнотда АҚШ Сурия осмонида парвоз қилинмайдиган ҳудудлар ташкил этишга тайёрлиги маълум қилинган. Бундан ташқари, Россия расмийлари билан ҳамкорликда ўрнатилажак тартибни назорат қилиш ва гуманитар таъминот етказилиши ташкил қилиш ҳам таклиф қилинган.

Тиллерсоннинг баёноти АҚШ президенти Доналд Трамп ва Россия Федерацияси раҳбари Владимир Путиннинг шу ҳафтада Германяда бўлиб ўтадиган илк учрашувидан олдин эълон қилинмоқда.

Давлат котиби АҚШ ва Россиянинг ҳал қилинмаган зиддиятларга эгалигини тан олган ва Сурияда тинчлик ўрнатиш учун иккала мамлакат ўзаро «келишиши» кераклигини таъкидлаган. Тиллерсоннинг айтишича, айни пайтда ИШИД гуруҳи «оғир жароҳат олган» ва буткул мағлубиятга учраш арафасида турибди.

Америка қўшинлари ИШИДнинг таянчи бўлган Раққада ҳужумни давом эттирмоқда. Аммо давлат котиби Россиянинг Суриядаги низони ҳал этишда «амалий аҳамият»га эга эканлигига алоҳида урғу берган.

“Ҳозирча барқарорликни кафолатловчи мукаммал режа мавжуд эмас экан, ИШИД ёки бошқа террорчи гуруҳлар ҳаракатига қарши туриш учун барча имкониятларни кўриб чиқишимиз керак”, – деб айтган Рекс Тиллерсон.