Жума куни Германиянинг Гамбург шаҳрида Америка Қўшма Штатлари ва Россия Федерацияси президентларининг учрашуви натижасида Сурияда ўт очишни тўхтатишга келишиб олинди. Бу ҳақида Associated Press агентлиги хабар бермоқда.

Доналд Трамп АҚШ президентлигига сайлангандан бери иккала мамлакат биринчи марта ўзаро бир фикрга келишган. Ўт очишни тўхтатиш бўйича битим якшанба куни маҳаллий вақт билан пешинда кучга киради. Мазкур маълумотни АҚШ расмийлари ва Иордания ҳукумати тасдиқлаган.

Президентлар учрашувида иштирок этган АҚШ давлат котиби Рекс Тиллерсоннинг айтишича, Суриянинг Иордания билан чегарадош ҳудудларида қон тўкилишини тўхтатиш учун битимга эришилган. Тиллерсон тинчлик ўрнатилажак ҳудудни Суриядаги энг мураккаб фронтлардан бири дея таърифлаган.

Хабар қилинишича, Америка ва Россия раҳбарларининг ўзаро мулоқоти 2 соатдан ортиқроқ вақт давом этган. Эришилган муҳим келишувга изоҳ берар экан, Тиллерсон сулҳнинг АҚШ ва Россия биргаликда ишлай олишидан нишона бўлгани таъкидлаган.

Ҳозирча келишувнинг батафсил шартлари эълон қилинганича йўқ. Россия ташқи ишлар вазири Сергей Лавров битимни Россия ҳарбий полицияси назорат қилишини маълум қилган. Давтлат котиби эса мазкур масала устида ҳали иш олиб борилаётганини айтган. АҚШ Давлат департаменти вакилининг айтишича, бир неча кун ичида келишув шартлари охирига етказилиши керак.

Ўт очишни тўхтатиш ҳақидаги битим Сурия масаласида келиша олмаётган Америка ва Россия дипломатияларининг энг катта ютуғи бўлиши мумкин. Сурияда 6 йилдан бери давом этаётган фуқаролар урушида улар қарама-қарши томонларни қўллаб келишган.

Америка ҳарбийлари томонидан Сурия авиабазаси ракеталардан ўққа тутилиши ва Сурия қирувчи самолётининг уриб туширилишидан сўнг бу келишувни кутилмаган дейиш мумкин. Янги битимнинг Россия, Туркия ва Эрон ўртасида тузилган келишувларга алоқаси йўқлиги айтилмоқда.