Дўстлик мавзесидаги 7-уйнинг биринчи қаватида яшовчилар зина майдончасига ташлаб кетилган, туғилганига ҳали бир ҳафта ҳам бўлмаган чақалоқ топиб олишди. Бу ҳақида "Новости Узбекистана" хабар бермоқда.

29 ноябрь кеч соат 10ларда 4 қаватли уй подъездида чақалоқ йиғиси эшитилди. Чақалоқнинг йиғисини биринчи бўлиб биринчи қаватдаги хонадонлардан биридаги итлар эшитишди ва қаттиқ ҳура бошлашди. Жониворларнинг эгалари ва уларнинг қўшнилари хонадондан ташқарига чиқишиб, зина майдончасида қора рангли спорт сумкаси турганини кўришди. Улар сумкани очмасликка қарор қилишди ва қўшни подъездда яшовчи домкомга қўнғироқ қилишди.

Домком Зоя хола сумкада чақалоқ борлигини билиб, дарҳол сумкани очди. Сумка ичида совуқ ва йиғидан кўкариб кетган чақалоқ ётарди.

"Уни ичида тирик гўдак ётса нимани кутишим керак? Музлаб қолса-чи? Сумкани очганимизда у кўкариб кетган экан. Бундай совуқ учун унинг усти жуда юпқа эди. Чақалоқда памперс, юпқа йўргак, колготка ва пайпоқ бор экан, эски адёлга ўраб сумкага солиб қўйибди. У бу бетон устида қанча вақт ётганини билмаймиз-ку. Уйга олиб кириб дарҳол иситдим. Мовут рўмолга ўраб, устига адёл ташладим. Унинг юзига қон югуриб ухлаб қолди. Бечора", — дейди домком.

Аёл шу заҳоти участка инспектори ва тез ёрдамга қўнғироқ қилди. Воқеа жойига ИИБ ва прокуратура ходимлари ҳам етиб келишди. Шифокорлар чақалоқни шаҳардаги 5-клиник касалхонасига олиб кетишди. Текширувда унинг соғлом эканлиги аниқланди.

Гувоҳларнинг айтишларича, чақалоқ туғилганига ҳали бир ҳафта ҳам бўлмаган: киндиги оддий ип билан боғланган бўлиб ҳали тушмаганди. Шундан келиб чиқиб, ҳуқуқни муҳофаза қилиш органлари ходимлари она уни туғруқхонада дунёга келтирмаган деган хулосага келишди. Бу эса унинг онасини топишни қийинлаштиради. Милиция ходимлари ўша куни итлар унинг изини топишганини, лекин чорраҳада излар йўқолганини билдиришди. Аёл машинага ўтириб кетган бўлиши мумкин. Милиция ходимлари шу уйда яшовчи фуқаролардан бирининг машинасига ўрнатилган камерадаги ёзувдан ҳам ҳеч нарсани аниқлай олишмади. Аёл уйга бошқа томондан келган. Оператив ходимлар мазкур туманда бундай ҳодиса тўртинчи марта юз бераётганини айтишди.

Ҳуқуқни муҳофаза қилиш органлари энди жиноий жавобгарликка маҳкум этилажак онани қидиришмоқда.