Тожикистон пойтахти Душанбедан 20 километр узоқликдаги Ҳисор туманида президент Имомали Раҳмон қаламига мансуб “Тожиклар тарих ойнасида” номли асарга бағишлаб ёдгорлик ўрнатилди.
Очиқ китоб шаклидаги ёдгорликнинг узунлиги 4 метрга, кенглиги эса 6 метрга, оғирлиги 1 тоннага тенг. Айни пайт Ҳисор тумани Халқ таълими бўлими ёнидаги ёдгорликни яқин орада Ҳисор тумани марказига кўчириш режалаштирилган.
Илк бор 2002 йилда нашр этилган “Тожиклар тарих ойнасида” китоби тожик халқининг тақдири ҳақида ҳикоя қилади. Ҳисор тумани Халқ таълими бўлими раҳбари Назри Асадзоданинг айтишича, ушбу асарга ёдгорлик ўрнатишдан мақсад ёшларда ватанпарварлик руҳини ўстиришдир.
64 ёшли Имомали Раҳмон Тожикистонни 1992 йилдан бери бошқариб келмоқда. Ўтган йили у расман Миллат раҳнамоси деб эълон қилинди.