O‘zbekiston Respublikasi Prezidenti vazifasini bajaruvchi, Respublika Bosh vaziri Shavkat Mirziyoyev 18 sentyabr kuni Toshkent shahrining bir qator tumanlarida bo‘lib, amalga oshirilayotgan bunyodkorlik va obodonlashtirish ishlari, aholi mavzelari, ko‘p qavatli uy-joylar va ijtimoiy soha ob’yektlarini kuzgi-qishki mavsumga tayyorlash ishlarining holati bilan bevosita tanishdi. Bu haqda «Toshkent oqshomi» gazetasi xabar bermoqda.

Yunusobod tumanidagi bunyodkorlik va obodonlashtirish ishlari bilan tanishuv davomida mamlakatimizning Birinchi Prezidenti Islom Karimovning ko‘rsatmalariga binoan Toshkent metropoliteni yo‘llarini zamonaviy yo‘lsozlik va tunnelsozlik texnologiyalarini joriy etish orqali davom ettirish ishlariga alohida e’tibor qaratildi.

Xususan, Yunusobod yo‘nalishidagi 2 ta bekatda qurilish ishlarini yakunlash, yangi yer osti va yer usti tezyurar metro yo‘nalishlari qurilishini loyihalashtirish masalalari yuzasidan tegishli vazirlik va idoralar rahbarlariga topshiriqlar berildi.