Samarqandda Islom hamkorligi tashkiloti yordamida Islom ilmiy-tadqiqot markazi tashkil etilishi mumkin. Bu haqda O‘zbekiston Prezidenti vazifasini bajaruvchi, Bosh vazir Shavkat Mirziyoyev bildirdi, deb xabar bermoqda RIA Novosti.

"Biz Samarqand shahrida islom dunyosi olimlari va donishmandlari merosini o‘rganish bo‘yicha Islom hamkorligi tashkiloti yordamida Islom ilmiy-tadqiqot markazini tashkil etish taklifini bildiramiz", — dedi Shavkat Mirziyoyev Toshkentda IHT tashqi ishlar vazirlari kengashining 43-sessiyasi ochilish marosimida.

Uning so‘zlariga ko‘ra, bunday markazning tashkil etilishi O‘zbekistonning IHT TIVKdagi "ta’lim va ma’rifat – tinchlik va bunyodkorlik yo‘li" shiori ostidagi raisligining ustuvor maqsadlaridan biridir.

Shavkat Mirziyoyev O‘zbekiston zaminida Imom al Buxoriy, Imom at Termiziy, Abu Rayhon Beruniy, al Xorazmiy, Imom al Moturidiy kabi islom olamining buyuk va mashhur namoyandalari yashab o‘tishganini eslatib o‘tdi.