Сербияда 2023 йилда электр энергияси деярли 10 фоизга, газ нархи эса 11 фоизга ошади. Бу ҳақда мамлакат кончилик ва энергетика вазири Дубравка Джедович-Негре маълум қилди, дея хабар беради "ТАСС".

"2023 йилдан бошлаб электр энергияси нархи 10 фоиздан камроқ ошади, бу ўртача уй хўжалиги учун ойига 300 динордан кам бўлади. Газ нархи 11 фоизга кўтарилади", — деди сиёсатчи.

Унинг сўзларига кўра, давлат электр энергияси учун субсидиялар тўлашда давом этмоқда, шунинг учун мамлакатда унинг нархи Европа минтақасидаги энг паст кўрсаткичлардан бири бўлади. Шу билан бирга, жаҳон бозорида газ нархи бир неча бор ошди, аммо Сербияда у саноат учун энг арзон нархлардан бири ҳисобланади.

Унинг қўшимча қилишича, энергетика инқирози шароитида истеъмолчиларни узлуксиз энергия билан таъминлаш учун барча имкониятларни ишга солиш зарур.

Ноябрь ойи бошида республика президенти Александр Вучич яқин келажакда Сербия ҳукумати ҳозирда Газпром Нефтга тегишли бўлган Сербия нефть саноатидаги Россия улушини сотиб олиши мумкинлигини эълон қилган эди.