Валюта курси: Ўз.Р.Марказий банки
USD
АҚШ доллари
EUR
Eвро
RUB
Россия рубли
Sayt test rejimida ishlayapti!!!

Сўнгги янгиликлар






Уйғурлар ҳуқуқлари: АҚШ Hikvision ва Хитой хавфсизлик бюроларини қора рўйхатга киритди
8.10.2019 12:12,  
586

АҚШ Савдо Департаменти кузатув ускуналари ишлаб чиқарувчи фирмаларни АҚШдан маҳсулот сотиб олиши учун махсус рухсатнома талаб қилинадиган корхоналар рўйхатига киритди.

АҚШ Савдо Департаменти душанба куни Хитойга тегишли бўлган 28 та жамоат хавфсизлиги бюроси ва компанияларини “савдо бўйича қора рўйхат”га қўшди. Уларнинг орасида видеокузатув ускуналарини ишлаб чиқарувчи Hikvision компанияси ҳам бўлиб, бу қарор расмий Пекиннинг Уйғур мусулмонлари ва Хитойдаги бошқа мусулмон жамоаларга нисбатан тазйиқларидан кейин қўлланган.

“Муассасалар рўйхати” деб номланган бу рўйхатда Шинжон Уйғур Мухтор вилояти Халқ ҳукумати жамоат хавфсизлиги бюроси, 19 та ҳукумат агентлиги ва 8 та тижорий фирма номи бор.

Тижорий фирмалар ичида Zhejiang Dahua Technology, IFLYTEK Co, Xiamen Meiya Pico Information Co ва Yixin Science and Technology Co номлари қайд этилган.

Департамент изоҳига кўра, “бу муассасалар инсон ҳуқуқлари бузилиши, Хитойдаги қатағон ва асоссиз равишда оммавий ҳибсга олиш, уйғур, қозоқ ва бошқа озчилик мусулмон гуруҳларига қарши қатъий кузатув жараёнида иштирок этган”.

Рўйхатда шаҳар ва туман жамоат хавфсизлиги бюролари ва Шинжон Полиция Коллежи номи ҳам қайд этилган.

АҚШ расмийларининг билдиришича, бу эълон шу ҳафта Хитой билан бўлиб ўтадиган савдо музокараларига боғлиқ эмас.

“Муассаалар рўйхати”даги компаниялар расмий Вашингтон розилигисиз АҚШ компанияларидан эҳтиёт қисмлар ва керакли маҳсулотларни сотиб ололмайди. Савдо Департаменти бунгача Huawei Technologies Co ва 100 дан ортиқ компанияни айни рўйхатга қўшган эди.

“Инсон ҳуқуқлари бузилишига масъул”

Расман Hangzhou Hikvision Digital Technology Co Ltd номи билан аталадиган Hikvision компаниясининг савдо айланмаси 42 миллиард АҚШ долларини ташкил этиб, уни жаҳондаги энг йирик видеокузатув маҳсулотлари ишлаб чиқарувчисига айлантирган.

Август ойида Рейтерс эълон қилган ҳисоботга кўра, компания ўзининг 50 миллиард юанлик (7 миллиард $) даромадининг 30%ини хориждаги бозорлардан топади.

Hikvision Савдо Департаментининг эълонига ҳали ўз муносабатини билдиргани йўқ. Вашингтондаги Хитой элчихонаси ҳам бу борада изоҳ беришга шошилмаяпти.

Ўтган апрел ойида АҚШ қонунчиларининг бир гуруҳи Хитой компанияларига қарши чора қўллаш кераклигига урғу берган, Hikvision ва Dahua компанияларининг номини алоҳида қайд этиб, уларни “инсон ҳуқулари бузилишига масъул” деб атаган эди.

Хитой айни вақтда ғарблик сармоядорлар ва БМТдаги мутахассисларнинг тобора кескинлашиб бораётган айбловлари билан юзлашмоқда. Бунга сабаб: бир миллиондан ортиқ уйғур ва бошқа мусулмон жамоалар вакилларининг қамоқ лагерларида тутиб турилгани.

АҚШ Давлат Котиби Майк Помпео ўтган ҳафта Ватиканда берган баёнотида “Давлат авторитар бошқарувга ўтса, у ўз фуқароларидан Худога эмас, ҳукуматга сиғинишни талаб этади. Шунинг учун ҳам Хитой бир миллондан ортиқ уйғур мусулмонларини қамоқ лагерларига жойлаштирди, шунинг учун ҳам насроний пасторлар қамоққа ташланди”, деганди.

IPVM видеокузатув тадқиқотлари компанияси асосчиси Жон Ҳоновичга кўра Hikvision ва Dahua компаниялари АҚШдаги Intel Corp, Nvidia Corp, Ambarella Inc, Western Digital ва Seagate Technology компанияларидан таъминотчи сифатида фойдаланади. Айнан шунинг учун ҳам Савдо Департаментининг бу қарори Хитой компаниялари учун ҳалокатли бўлиши мумкин.

Ушбу қарор эълон қилинганидан кейин Калифорнияда жойлашган яримўтказгичларни ишлаб чиқарувчи Ambarella компаниясининг акциялари биржада савдо бошлангач 12%га тушиб кетган.

Трамп маъмурияти шу йил август ойида 5 та Хитой компаниясидан телекоммуникация жиҳозларини сотиб олишни вақтинча тақиқловчи қарор қабул қилган, улар орасида Huawei ва Hikvision ҳам бор эди.

Huawei бунгача Хитой ҳукумати, ҳарбийлари ёки махсус хизматлари томонидан назорат қилинишини бир неча бор рад этиб чиққан, АҚШ ҳукуматининг тақиқи юзасидан судга ариза ҳам берган.

Тавсия этамиз






Ҳар доим хабардор бўлинг!

carzone.uz мобил иловаларини кўчириб олинг ва барча янгиликлар сиз билан