Украина Халқаро Валюта Жамғармаси (ХВЖ) билан 20 миллиард долларгача кредит олиш бўйича музокаралар олиб бормоқчи. Бу ҳақда Украина Миллий банки раҳбари Кирилл Шевченко Reuters агентлигига берган интервьюсида маълум қилди.

Шевченконинг сўзларига кўра, Киев аллақачон ХВЖга тегишли сўров юборган ва ҳозирда маслаҳатлашувлар ўтказмоқда. Кредитнинг бир қисми сифатида Украина икки-уч йил давомида Standby кредит шартномаси ёки кенгайтирилган молиялаштириш дастури шаклида 20 миллиард долларгача олиши мумкин.

Бундан ташқари, Киев Англия банки билан «бир неча ҳафта ичида» своп линияси бўйича келишувга эришмоқчи, дея қўшимча қилди Шевченко.