Яқиндагина ташкил этилган Ўзбекистон Президенти ҳузуридаги Лойиҳа бошқаруви миллий агентлигига Шуҳрат Содиқов директор этиб тайинланди. Давлат раҳбари 1 август куни шу ҳақдаги фармонни имзолади.
Мазкур тайинловга қадар Шуҳрат Содиқов (1969 йилда туғилган) 2010 йилдан бери Вазирлар Маҳкамасининг ахборот ва телекоммуникация тизимлари бўйича Ахборот-таҳлил департаменти мудири лавозимида фаолият кўрсатиб келаётган эди.
Унгача — 2008—2010 йилларда «Ўзбектелеком» компанияси бош директори, 2006—2008 йилларда бош директор ўринбосари лавозимларида ишлаган.
Лойиҳа бошқаруви миллий агентлиги Президентнинг 24 июлдаги фармони билан ташкил этилди. Ҳужжатда лойиҳавий бошқарув тамойилларига асосланган қарорларни ишлаб чиқиш ва назорат қилишнинг замонавий шакл ва усулларини жорий этиш кўзда тутилган.