БМТ Хавфсизлик Кенгашига АҚШ ҳукумати томонидан КХДРга қарши янги санкциялар жорий қилиш бўйича резолюция лойиҳаси тақдим қилинади. Guardian нашри хабарига кўра, бугун Хавфсизлик Кенгашида резолюция овозга қўйилади.

Резолюция қабул қилинадиган бўлса, Шимолий Корея иқтисодиётига қаттиқ зарба бўлади. Янги санкциялар мамлакатнинг оғир ва озиқ-овқат саноатини нишонга олади. Унга кўра Шимолий Кореяга кўмир, темир, темир рудаси, қўрғошин, қўрғошин рудаси ва денгиз маҳсулотларини экспорт қилиш тақиқланиши мумкин.

Мазкур маҳсулотлар экпорти Шимолий Корея экспорт қиладиган товарларнинг учдан бир қисмини ташкил қилади. Агар рзолюция қабул қилинадиган бўлса, Шимолий Кореянинг 3 миллиард долларлик йиллик экспорти учдан бир қисмига қисқариши мумкин.

Хавфсизлик Кенгаши вакилининг маълум қилишича, резолюция ташаббусчилари унинг қабул қилинишига шубҳа қилишмаяпти. Жума куни резолюция лойиҳаси кенгаш аъзоларига кўриб чиқиш учун тақдим қилинган. АҚШ КХДРни иккита қитъалараро баллистик ракета синовини амалга оширгани учун жазолашни истамоқда.

Резолюция қабул қилиниши учун камида 9 та давлат уни ёқлаб овоз бериши ва вето ҳуқуқи бўлган давлатлардан бирортаси (АҚШ, Россия, Франция, Буюк Британия ва Хитой) унга қарши чиқмаслиги керак бўлади.

Резолюцияда турли мамлакатларда меҳнат қилаётган кореялик меҳнат муҳожирлари сонини чеклаш, Шимолий Корея билан қўшма корхоналар ташкил қилиш ва мавжуд корхоналарни молиялаштиришни тақиқлаш ҳам кўзда тутилган.