Ўзбекистон Швейцариянинг қонунчилик ва бошқа масалалардаги тажрибасини 2017-2021-йилларга мўлжалланган Ҳаракатлар стратегиясини амалга ошириш давомида қўллашни режалаштирмоқда.
Бу ҳақда Ўзбекистон ташқи ишлар вазири Абдулазиз Кoмилов ва Швейцариянинг фавқулодда ва мухтор элчиси Оливье Шав ўртасидаги учрашувда маълум қилинди.
Ўзбекистон ТИВ матбуот хизматининг маълум қилишича, томонлар шунингдек, Ўзбекистон-Швейцария ҳамкорлигининг ҳозирги ҳолати, уни янада мустаҳкамлашнинг истиқболлари, долзарб минтақавий ва халқаро муаммолар муҳокама қилди.
Бундан ташқари, икки томонлама алоқаларни фаоллаштириш, вазирликлараро сиёсий маслаҳатлашувлар ўтказиш амалиётини давом эттириш, ўзаро савдони ошириш, инвестицион ва молиявий ҳамкорлик ҳамда маданий-гуманитар алмашинувни кенгайтиришдан томонлар манфаатдорлиги тасдиқланди.