Россиянинг Судандаги элчиси Миргаяс Ширинский Судан пойтахти Хартумдаги уйида ўлик ҳолда топилди, деб хабар бермоқда Al Arabiya телеканали. Телеканал манбасининг таъкидлашича, Ширинский бассейнда жонсиз ҳолда топилган. Телеканалнинг полициядаги манбасининг маълум қилишича, элчининг зўравонлик аломатлари билан ўлганидан дарак берувчи ҳеч қандай маълумотлар мавжуд эмас.

Айни вақтда вазирлик матбуот котиби Сергей Коняшин чоршанба куни кечқурун вафот этган элчи Миргаяс Ширинскийнинг ўлимига юрагидаги муаммолар сабаб бўлган бўлиши мумкин, деган тахминлар билдирган. Дипломат ўлими сабаби расман эълн қилинган эмас.

"Бу ҳодисада қасддан содир этилган қотиллик изларини ахтариш керак эмас", — деб ёзган полициядан олган маълумотларга таянган ҳолда Франс Пресс агентлиги. Судан полицияси агентликка элчи "бассейнда сузаётган чоғида вафот этганлигини айтган.

Судан Ташви ишлар вазирлиги дипломат вафоти муносабати билан ҳамдардлик билдирган.

1954 йилда туғилган Миргаяс Ширинский 1977 йилда МГИМОни тамомлаган ва шу вақтнинг ўзида дипломатик хизматга киришган. У вазирликнинг марказий аппаратида ҳам, чет элда ҳам фаолият юритган. 2010 йилда унга Фавқулодда ва Мухтор Элчи мақоми берилган. Ширинский 2013 йилдан Россиянинг Судандаги элчиси вазифасини бажариб келаётган эди.